Føroya Skúlabókagrunnur hevur við hesum verki givið út fyrstu fullfíggjaðu føroysku floruna í litum. Føroysk flora er skrivað teimum mongu, sum hava áhuga fyri plantum, men er tó í fyrsta lagi ætlað sum undirvísingarmiðil í skúlunum. Á floruni eru plantuættirnar, plantuskipanin, navnareglur, plantubygnaður, útbreiðsla og tíðleiki. Tær 67 ættirnar í floruni eru viðgjørdar í teksti og við littekning av einstøku plantusløgunum. Harumframt er listi við latínskum plantunøvnum og merking teirra og ein umfatandi listi við frøðiheitum. Alt hetta skuldi gjørt nýtsluna av bókini lættari.